AFinLAn syvyssimpouzium ozuttau, gu karjala pädöy tiijollizen tutkimuksen kielekse
Äijät tietäh, gu Päivännouzu-Suomen yliopistos opastetah da elvytetäh karjalan kieldy, ga karjalan tutkimus voi olla vierahembi kogonažus. Ilmivö ei koske vaigu karjalan kieldy, ga ylehizelgi tazol tiijollizen tutkimuksen tulokset ei vältämättäh nävytä yliopiston libo tutkijoin yhtehistön ulgopuolele. Yhtelaigua varavonalazen kielen kontekstas on eričyksellizen tärgei, gu tutkimusruado konkretnoih tabah avvuttas kielen pagizijoi libo ližiäs ylehisty tieduo varavonalazeh kieleh da sen pagizijoih näh.
Päivännouzu-Suomen yliopiston karjalan opastajat da specialistat tahtotah omassah ruavol ozuttua, gu karjala on elävy da kehittyi kieli, kuduadu voi käyttiä jogahizes kontekstas. Konferensiet da toizet tiijollizet tapahtumat ollah täh hyvii kohtii. Karjalan kieli nägyygi ylen hyvin Suomen sobivuttajan kielitiijon yhtistyksen AFinLAn syvyssimpouziumas, kudai pietäh Jovensuus kylmykuun ezmäzel nedälil.
Tärgei vuitti karjalan nägövih nostandua on olluh simpouziuman verkosaitan kiändämine karjalakse. Karjala ei jiä verkosaital vaigu pikkarazen ližätervehtyksen kielekse, ga kogo verkosaitu on nellikieline – samat tiijot voit lugie suomekse, ruočikse, karjalakse da angliekse. Nengomil piätöksil karjalua tuvvah samale tazole toizien yliopistos da yhtehiskunnas käytettylöin kielienke.
Yliopistos luajitah eriluadustu karjalan kieldy da sen pagizijoi koskijua tutkimustu. Täs tutkimukses karjalan kieli ei ole vaigu tutkimuskohteh, ga se on sežo ruadobruja. Tämä tarkoittau, gu yliopistol luajitah karjalankielisty tutkimustu. Tiettäväine ezimerkikse karjalankielizen tutkimusartikkelin julguandu on ylen jygei, ga konferenciet da toizet tiijollizet tapahtumat taritah tutkijoile mahton ozuttua omassah tutkimustu hos mittumal kielel, karjalaksegi.
AFinLAn syvyssimpouziumas pietäh karjalan kieldy koskii Pagizemmo karjalakse -ruadopaja. Ruadopajan muvvostetah kuuzi tiijollistu tutkimustu kaččelijua ezitelmiä, kaksi suomekse da nelli karjalakse. Simpouzium ei ole kaikile avvonaine, ga olemmo kerännyh täh kirjutukseh ruadopajan karjalankielizien ezitelmien abstraktat libo lyhyöt kuvavukset. Net hyväh tabah ozutetah, mittuine on tiijolline karjala da mittumua karjalankielisty da karjalua koskijua tutkimustu Päivännouzu-Suomen yliopistos luajitah.
Tuttavustu abstraktoih alahan! Tekstat avavutah očikkoloi plikkuamal.