Vienankarjalaini pakinaklupi kevyällä 2024, kolmaš pakinakerta

Stolakirja 19.2.2024

Kirjuttan: Olga Karlova

Eklein meitä oli 10 pakinoilla. Vašta jäleštä päin hokšain, jotta enhän mie muistan juohattua teilä etukynteh hoš iellisenä piätiččänä enšimmäisaren pakinakerran Zoom-vaštauvuntua. Stukoi stakoi ei muissa kačo toista kättäkänä! Ka on ollun ni uutta tulijua; miän klupin ruantah on tullun tuttavuštumah Ira, kumpasen muamo on Kiestinkistä päin. Toivomma, jotta piäšet toiččiki yhtymäh miän klupin ruantah. Tule terveh!

Alkuh šanelin elvytyšprojektin kuulumisie. Käykyä kaččomah uutta Karjalaini nimistö -šivuo: linkki. Nimistökurššin opaštujat on šomah luatuh rakennettu karjalaisie kylie nimistöineh karttoneh. Slaidissa 1 (kačo PP-tiijošto) on Sirpa Männyn luatima Kammiččaniemi-nimisen kylän kartta.

Tällä netälillä pyhänäpiänä Kaikkien pakinapirtin kučuttuna pakasijana on Mari Rajamaa. Lisyä tietuo: linkki Pakinapirtti-Paginapertti-Paginperti šivulla, kačo kirjutuš 26.02.2024. Tulkua terveh py 25.02. klo 16 Zoom-pirttih!

Piätiemana on ollun Kuivajärvi, kumpasešša on Hietajärven ta Kuivajärven yhtehini Pyhän Miikkulan časouna. Kaččelima kuvie ta Pertti Virtarannan vienalaisien pakautteluista tiijuštima, jotta rahvahan mukah Pyhä Miikkula šuojeli lampahie ta autto meččämiehie šuamah lintuja. Kuivarvešša ta Hietarvešša časounua on šanottu čiässöynäkši.

Šiitä muistelima Domna Huovista ta hänen perintyö. Domna oli tullun Kuivarveh miehol’ah rajan takuata Niskajärven kyläštä. Hänellä oli vain 17 vuotta ta oma šukunimi oli Karhunen. Domnalla oli itettäjän neruo ta hiän itki iänellä kylän häissä ta muissa pitoloissa tilantehen mukah. Eero Lahelma oli 5-vuotisena ativoissa Kuivajärvellä kešällä 1952, heijän perehen lähtiessä kotih Domna rupei iänelläitkömäh: linkki valokuvah, Sampo-tietokanta, KSS.

Olen lisännyn slaidiloih linkin Ylen Elävä arkisto -šivulla olijah ratijoprogrammah, kumpasešša pakautellah Domnua. Käykyä kuuntelomah: Linkki Ylen Runonlaulanta vie matkalle muinaisiin ääniin -artikkeliin sekä radio-ohjelmaan. Pakauttelun lopukši Domna esittäy iänelläitkuo, kumpasešša passipoiččou helsinkövehtä, ket on pietty häntä hyvänä kostissa. Tämäki on tilantehen mukah šyntyn itku. Linkin on juohattan Tiina, passipo šuuri!

Slaidiloista löyvättä ni kuvan Domnan sorokašta, min hiän šai prituanieksi miehellä männeššä. Nykyjäh sorokka on tallešša Karjalan Šivissyššeuralla.

Pakasima ni Domnan pirtistä, jotta meilä olis huaveh šuaha šitä jälelläh kulttuuriseh käyttöh. Še vois ruatua vienankarjalaisen kulttuurin keškukšena, kumpaseh voipi keräytyö ta ruatua mitänih yheššä karjalaisen kulttuurin ta kielen eteh. Pityä hoš karjalan kielen kurššija ta käsiruatopajoja, ommella ičelläh koštuo, sorokkua ta paitua tahi tikuttua kintahie, pityä karjalaisen musiikin netälinloppuja, lapšien kielileirijä, käyvä yheššä šieneh ta marjah, ihual’l’a luontuo.

Kerttu on kuullun, jotta Domnan pirtin lakašša (=vintissä) šuattau kuutessiutuo ‘kummitella’. Jotta ken lienöy toičči on smuttin šielä rahvašta.

Toisekši jälkimmäiseššä diašša ollah hietarvi-kuivarveläisien Ranta-Miikkulan, Huovisen Annin ta Domnan pakinat kotielukoista. Koirua on pietty hyvänä tovarissana ta šitä ei šuanun jättyä iltasetta.

Mainičin kuivajärveläistä Pentti Huovista, kumpani on vanhin eläjistä Huovisista. Olen pakautellun häntä kolme vuotta takaperin karjalan kielen netälie vaššen. Voipi lukie tai kuunnella vienankarjalakši Olgan čuppusešša: linkki pakautteluh Kuinpa elät Kuivajärven vienalaini?

Jälkimmäiseštä slaidista löyvättä lisyä linkkie.

Oli kyšytty pikkušanoista: ta ‘ja’, i ‘ta; myös; -kin’. Myöššymmä näih tulijalla kertua. Valmissan erikseh dian näistä kielišeikoista.

Näkeyvymmä  ensi kuun alušša 11. kevätkuuta klo 16.40!