Roštuonlaulut karjalakši
Tällä šivulla on kerätty vienankarjalakši kiännettyö roštuonlauluo.
On hanket korkiet, kinokšet
On hanket korkiet, kinokšet
vain Roštuo armaš on meilä!
On vilut, paukkujat pakkaset
ta puhujat pohjan tuuloset,
vain Roštuo armaš on meilä.
Myö tuaššen laulamma ihuallen
kuni Roštuo armaš on meilä!
Še valtuau mielen ta šytämen
ta murtau murehen entisen,
mi kašvo elokšen tiellä.
Oi ruvekkua, yštävät, laulamah,
kuni Roštuo armaš on meilä!
On Roštuo tuttava ammuistah
on tänne pyörähtän aijallah
ta kostiu kotvasen meilä.
Nyt laulut tähtilöih kaijutah,
kuni Roštuo armaš on meilä!
On kahallah veräjät taivahah,
kun nöyränä ollou matallah,
kuni Roštuo armaš on meilä.
Oi anna, Hospoti, armuoš,
kuni Roštuo armaš on meilä!
Ta rahvašta šuojua voimallaš,
meit’ auta näkömäh taivahaš,
kuni Roštuo armaš on meilä!
Šävellyš: Jean Sibelius
Šanat šuomekši: Vilkku Joukahainen
Kiännöš vienankarjalakši: Johanna Pelling ta Olga Karlova
Kiäntäjät passipoijah Pekka Suutarie kiännöštekstin ta šävelen yhteh šovittamua!
No ollou tullun kešä
No ollou tullun kešä
nyt talvišiämellä,
ka luatinemma pešän
myö lintusilla.
Miän kuuši tuohukšie
jo puhkei kukkimah,
čillien helähykšie
nyt rupei kuulumah.
Ta starikkaki nuortuu
kuin lapši kisuamah,
ta koukkušelkä šuortuu,
niin kai on mielissäh.
Niin hyvä, lämmin, hellä
on mieli šiun ta miun.
Oi još imehnisellä
ois Roštuo ainani.
Kiännettih: Elena Rapa (Ravan Jelena) ta Olga Karlova (Lammaisjärven Olka).
En eči valtua, kiiltuo
En eči valtua, kiiltuo
Ei himota kultua
mie tahon taivahan valuo
ta rauhua piällä muan.
Nyt Roštuo, ošan šuuren tuou
ta mielet noštau Spuassun luo.
Ei valtua, ei ni kultua,
vain rauhua piällä muan.
*
Kun koissa ollou šopuo
ta lapšilla kuušihut,
Jumalan šanan valuo,
mis’ šiämi kajoštuu.
Tuo kotihi, hot pienehki,
nyt roštuonjuhla hyväni,
Jumalan šanan valuo
ta mieleh iluo.
*
Luo köyhän ta i pohatan
tuloupi Roštuo.
Pimevytehe muailman
tuou taivahan valuo.
Šiut’ haluon, šilma vuotan,
šie Hospoti muan ta taivahan!
Nyt köyhän ta pohatan luo
ihala Roštuoš tuo!
*
Šäv. Jean Sibelius
Šan. Sakari Topelius
Šuom. Tuntematoin
Vienankarjalakši kiäntän Olga Karlova
*
Luve En eči valtua, kiiltuo -laulun karjalakši kiännökšeštä: linkki
Kuuntele karjalakši laulettuna YouTubešša: linkki
Roštuonkuuši
Vorssakši on šuoritettu
roštuonkuuši pirtissä;
n’amuset on riputettu
pruasniekkua vuottuas’s’a.
*
Valkien tuojat kyntteläiset
kilčetetäh šomašti;
ympärillä pikkaraiset
lauletah vienokkali.
*
Passipoiset šiula Spuassu
Pelaštaja kallis miän;
olet rahvašta šie läššä
šuuri ilo muailmal’.
*
Šanat šuomekši Gustaf Oskar Schöneman
Kiäntän vienankarjalakši Olga Karlova
Čilliset
Lunta tupruttau. On vilu talvišiä
Ei meijän liinakko enämpi tallih jiä
Šen kohta val’l’aššan ta matkah lähemmä
Helissäh vet čilliset, reješšä lennämmä.
*
Čilliset, čilliset loitoš kuulutah
Roštuota vaštuamah meitä kučutah
Čilliset, čilliset anna šoitetah
Meitä hyvät yštävät kostih vuotetah.
*
Vain pakkani paukkau ta purou nenyä.
Nakru lämmittäy ta on hyvä mieleštä.
*
Čilliset, čilliset loitoš kuulutah
Roštuota vaštuamah meitä kučutah.
*
Kiäntän vienankarjalakši: Darja Markelova
Kielentarkissuš: Olga Karlova