Karjalan- da võronkielisty toimindua Jovensuus 7.–9. oraskuudu
Jovensuus todevutetah 7.–9. oraskuudu projektu, kudai tariččou karjalan da võron pagizijoile mahtoloi tuttavuo toine toizen kielih da niilöin kehitändäh. Projektu on tarkoitettu paiči muudu nuorile da nuorile aiguhizile, da sen aigua joukko nuordu võron (kudai on eri kieli, migu eestin kieli) pagizijua matkuau Jovensuuh tuttavumah karjalan kielen elvytändäh. Projektua kordiniiruiččou Instagraman @segasugukiel-projektan kehittäi Nico Hannes yhtes võron- da karjalankielizien yhtehistölöinke.
Päivännouzu-Suomen yliopisto on keräl projektas da järjestäy karjalan kieleh liittyjän tapahtuman Jovensuun kampuksel piätteniččän 8. oraskuudu. Tapahtumu pietäh č 12–16 Agora-huonukses. Tarkemban programman lövvät tämän tekstan lopus. Tapahtumu on ilmaine da kaikile avvonaine, da kučummo matkujoukon ližäkse keräle kaikkii niilöi ristikanzoi, kudualoin elokseh karjalan kieli vaikuttau. Tapahtumah voijah ottua ozua sežo net, kenen mielii karjalah libo võroh opastundu kiinnittäy, ga tapahtuman verdavustuvellizen perusluondehen vuoh toivommo, gu ozanottajat kuulutah kieliyhtehistöh libo muite alalleh käytetäh karjalan kieldy.
Tapahtumas kuultah ezitelmii karjalan da võron kielih näh sego jagavutah ruadopajoih, kudualois paistah ezimerkikse kielen elvytändäs da vähembistökielen käytändäs. Tarkoituksennu on, gu eri kielien pagizijat voidas vaihtua kogemustu da tuttavuo toine toizenke. Ezitelmis käytetyt kielet ollah karjala, võro, suomi da anglii, da ruadopajois käytetäh yhtehizenny kielenny angliedu. Võro da karjala yhtelläh ollah sugukielii, da sendäh rakkahal kehoitamme sežo niilöin käyttöh da monikielizeh kommunikacieh. Voit ottua ozua tapahtumah, hos angliekse pagizendu olis sinule jygei. Joukot voijah muvvostua nenga, što jogahizes olis kylläl hyvin angliekse pagizijua libo tarvites tulkuajua ristikanzua.
Ezmässargen 27.4. č 16.30–18.30 pietäh matkah valmistai Zoom-tapahtumu, kuduas matkujoukon ozanottajat da Päivännouzu-Suomen yliopiston karjalan kielen elvyttäjät kerrotah perusdieloloi omassah kielih näh. Nenga varmistammo, gu varzinazennu tapahtumupäivänny ehtimmö kielitiijon ližäkse paista kogemuksii da aijankohtazii dieloloi. Zoom-tapahtuman ezitelmien kieli on anglii, ga toiziigi kielii suau käyttiä.
Mollembih tapahtumih voit ilmoittuakseh Webropol-ankietal. Linku Zoom-tapahtumah työtäh iččie ilmoitannuzile sähköpoštači. Ilmoittavundu piätapahtumah on omatahtoine. Voit sežo vaigu tulla keräle, ga ilmoittavundu avvuttau meidy planiiruimah tapahtumua tarkembah. Sendäh toivommo, gu ilmoitat ankietal sežo, mittumii kielii voit da tahtot käyttiä ruadopajas.
Kačo programmu alemba.
Yliopiston ližäkse programmua ollah luajittu Jovensuun karjalankieline yhtehistö sego Nico Hannes da matkujoukko. Yliopisto ei ole ottanuh ozua nämmien tapahtumien järjeständäh, ga juammo tieduo niilöih näh da rakkahal kehoitammo kaikkii, kenen mieldy tiemu kiinnittäy, ottamah ozua. Tarkembua tieduo tapahtumis juatah myöhembä matkan Whatsapp-joukos, kuduah voit liittyö työndämäh iččes nimen da telefonannoumeron sähköpoštači Niko Tynnyrizele ([email protected]). Niko työndäy sinun yhtevystiijot matkujoukole.
Kačo kogo matkan alustai programmu alemba.