Karjalaine nedälinloppu Valamos
Kirjutannuh Natalia Giloeva
Karjalan kieli da karjalaine kul’tuuru kirkettih Valamos mennyt nedälinlopul 23.–25.1. pietyl Karjalan kaiguloi täs kodvazes huomeneh –kursal (suom. Karjalan kaikuja tästä hetkestä huomiseen). Kursu oli organizuittu tostu kerdua. Nygöi tarkoituksennu on pidiä nengomua kursua sežo tulien vuon da toinah sit jo joga vuottu. Ylen hyvä!
Karjalazel nedälinlopul eri-igähizet ozanottajat čukeldettihes karjalazeh perindöh da sen nygözih muodoloih sego puututtih kielikylyh. Ristikanzoil oli mahto kaččuo omua välii karjalažuoh, lujendua yhtevyksii juurih sego löydiä kul’tuuru uuzis nägökohtis. Kursan piätarkoituksennu oli yhtistiä mennyön aijan kogemuksii da nygösty kodvastu sego avata uuzii troppazii tulien aijan karjalažuoh.
Ravieh karjalazeh nedälinloppuh otettih ozua opastajinnu sežo Ilja Mošnikov da Natalia Giloeva. Omis paginois hyö saneltih karjalan elvytändäs, kehitändäs da opastandas Päivännouzu-Suomen yliopistos, vastailtih ristikanzoin kyzymyksih, otettih ozua paginpertin pajoin viendäh sego panielipaginah. Yliopiston ruadajil tärgei oli olla keräl moizes pivos, kuduas puutui jagua tieduo karjalan kieles da sit, kui opastundu kieleh lujendau karjalastu identitiettua. Lopus rahvas kiitettih kursua äijäl da mainittih paiči muudu sidä, gu ylen suvaittih olla karjalan kielikylys.
