Karjalan kielen seminuaru Pikkuparluamentan Kanzalasinfos 24.9.2025
Ruado keviäl jullatun karjalan kielen elvytysprogramman tavoittehien eistämizekse edehpäi jatkuu raviennu. Programmu keriäy yhteh kohtah tiijot karjalan kielen histourieh näh sego ehoitukset kielen azeman kohendamizekse, ga vaigu programmutekstan perustehel ei voija ezimerkikse avata karjalankielisty kielikylyy libo ruveta opastamah karjalah perusškolas. Sendäh nygöi on tärgei kerduo programman tavoittehis da ehoituksis eri čuril da eri yhtevyksis.
Vereksin vuitti nečidä ruaduo on olluh 23.9. Helsingin Pikkuparluamentan Kanzalasinfos pietty elvytysprogrammua koskii seminuaru. Seminuaran organizuittih Karjalan Liitto da Suomen parluamentan Karjala-kluubu, da kučuttuloinnu pagizijoinnu oldih Päivännouzu-Suomen yliopiston da Kodimualazien kielien keskuksen specialistat. Enne heidy paginan avattih Karjalan Liiton paginanvedäi Martti Talja da Keskustan deputuattu Hilkka Kemppi.
Elvytysprogramman syväindölöi ozutettih karjalan kielen specialistujoukon paginanvedäi Pirkko Nuolijärvi, Päivännouzu-Suomen yliopiston yliopisto-opastai Niko Tynnyrinen da Kodimualazien kielien keskuksen eričysspecialistu Lotta Jalava. Kui heijän, mugai Taljan da Kempin paginvuorolois korostettih, gu on korgei aigu vastata aktiivizen da motiviiruitun karjalankielizen yhtehistön tarbehih da avvuttua heidy käyttämäh da vardoimah omassah kieldy. Nuolijärven, Tynnyrizen da Jalavan paginvuorolois aksentiiruittih zakonallizii muutoksii, kudualoin vuoh olis äijiä kebjiembi kehittiä da sebrata ezimerkikse karjalankielisty opastandua. Tarkemba programman syväindölöis voit lugie aijemba elvytyksen blogas jullatus programman julguandupruazniekas kuultuloi paginoi koskijas kirjutukses.
Paginoin loppiettuu seminuaran ozanottajat kyzyttih hyviä kyzymysty. Pagizimmo ezimerkikse karjalankielizis kielikylylöis da sit, mittumil alovehil karjalankielizet nygöi eletäh. Ozanottajat duumaittih sežo karjalazen kul’tuuran roulii kielen elvytändäs – mi se on da mindäh programmas ei ezimerkikse očikkotazol paista karjalazes kul’tuuras? On tottu, gu elvytysprogrammas – sen luadijoile annettuloin ohjavoloingi mugahizesti – keskitytäh karjalan kieleh, sendäh gu se on histouriellizesti jiännyh peittoh. Karjalastu kul’tuurua on suvaittu, kehitetty da suojattu Suomes, ga karjalankielizih näh tieduo da toimindua on olluh vaigu vähäine. Yksi kielen elvytysruavon kaikkii tärgiembii princippoi ongi tuvva karjalan kieldy samazele tazole toizien karjalazen kul’tuuran vuittiloinke. Joga tapahtukses on selgei dielo, gu kieldy et voi elvyttiä eriže kul’tuuras da gu kielen elvytändy ainos yhteltiedy kehittäy karjalastu kul’tuurua. Konzu karjalan pagizijoile taritah mahtoloi käyttiä omua kieldy da kehittiä karjalankieline identitiettu, voijah hyö luadie karjalankielisty taiduo da nenga kehittiä kogo karjalazen taijon kentiä.
Passibo vie kerdaine seminuaran järjestäjile da ozanottajile! Ruado karjalan elvyttämizekse jatkuu.
Seminuaru videokuvattih da sen voibi kävvä kaččomah Karjalan Liiton Youtube-kanualal.