Älä öntästy pertii ruokkijes da mattii pannes

Kirjutannuh: Natalia Giloeva

Mennyt kuul Karjalan Sivistysseura julgai Timoi Munnen da Natalia Giloevan luajitun kniigan ”Pertii ruokin. Mattii panen”. Kniigah on kerätty karjala-suomi-hairiehvedäjiä sanua virkehinneh. Kniigua on suvaittu järgieh sen julguamizen jälles da luadijoi on kučuttu pagizemah sih näh eri kohtih. Nenga sit egläi ehtäl Jovensuun Sointulas Timoi Munne da Natalia Giloeva saneltih kniigah näh da piettih lyhyččäzen hairiehvedäjän kiännösruadopajan, kuduas pidi kiändiä karjalaspäi suomekse paiči muudu nengomat virkehet: 

• Akkua ei pie varata. 
• Äijät mennäh rengilöinke meččäh. 
• Minä suvaičen sinuu. 
• Kai dengat mendih muijale. 
• Kai minun lapset mendih linnah da sie perehtyttih. 
• Häi uskaldi tulla kodvazen peräs. 

Virkehty oli äijy da äijät oli kiännetty oigieh, ga oletteli hairavostugi. Se on ihan ellendettävy dielo, kerran pagin on hairiehvedäjis sanois. Kirjan vessel nimi jo sanelougi kerras sih näh, gu lähäzis sugukielis voit löydiä midägi kummallistu. Nengoine sanastokniigu yhtelläh ei ole vai šuutkakse, ga sežo tovekse da hyövykse kaikile karjalan kielen suvaiččijoile, opastajile da opastujile, kiändäjile da tutkijoile: ellendät kieleh näh enämbän, konzu tiijustat moizetgi hairiehvedäjät sanat da niilöin käytön virkehis.