Enzimäzen karjalankielizen kniigukluuban kuulumizet
Kirjutannuh: Niko Tynnyrinen
Päivännouzu-Suomen yliopisto on pidänyh keviän aigua karjalankielisty kniigukluubua, kuduas lugiettih yhtes pala-palal Leena Lehtolazen Häi eli pajol -kniigu. Kniigan on kiändänyh karjalakse Maria Kuismin da muailman enzimäzenny karjalankielizenny dekkunnu se pädi ylen hyvin enzimäzen yliopiston organizuitun kniigukluuban kniigakse. Sanakse, kniigukluubu avattih yhtehizes ruavos kieliyhtehistön da karjalazien yhtistyksienke: kniigukluuban idejan meile annettih karjalankielizet nuoret da Häi eli pajol -kniigat saimmo podarkakse Karjalan Sivistysseuralpäi. Nengomua yhtehisty ruaduo meile pidäy tulielgi aigua!
Kluubu kerävyi keviän aloh kaikkiedah nelli kerdua. Yhtelaigua toizienke lugemine oli vessel processu, da lugukogemustu tävvendettih kluubas keräl olluzien Marian sego kniigan käzikirjutuksen kielentarkistajan Natalia Giloevan kommentat. Pagizimmogi kluubas äijän juuri kiändämizeh liittyjiä dieluo da duumaičimmo kniigah näh luajittuu uvvissanastuo. Kluubalazet löyttih kniigas tuttavuagi uvvissanua, sendäh gu niilöis erähii on aijemba kačottu yliopiston kiännösseminuarukursoil. Kielen opastus da elvytys sego kielele kiändämine tugietah toine tostu nengagi.
Äijät kluubalazet sanottih ezmäzes vastavundas, gu hyö lugietah kirjalližuttu ylen harvah. Netgi, ket lugietah enämbän, kerrottih, gu hyö ei äijäl suvaita dekkuu. Lugemine oli yksikai mieldykiinnittäi da saimmo kluuban aigua huomata, gu karjalakse klišietgi tunnuttih uuzile da vesselile. Suomekse vuvvennu 1993 jullatus kniigas mieldykiinnittäjänny dielonnu oli oppie eččie starinan aigukaudeh liittyjiä yksityskohtua. Matti-, seksu- da tietostandusanastuogi vois kerätä kniigas!
Vie se pidäy sanuo eriže, gu ni yksi kluubalaine ei arvannuh, ken ebäiltylöis oli piäniekku! Emmo yksikai, hos ehtiimmö ebäillä läs jogahistu huahmuo.
Passibo vie kaikile kniigukluubalazile da Karjalan Sivistysseurale! Jälgimäzes vastavundas erähät sanottih, gu nygöi himottais lugie karjalakse ližiägi juuri aiguhizile kirjutettuu kirjalližuttu da ezimerkikse ukonvemmelrahvahih näh kerrottuu kerdomustu. Jiämmö vuottamah uuzii mieldykiinnittäjii kniigoi! Täs on hyvä jatkua, toinah kniigukluubugi avavuu vie uvvessah.