Vienankarjalaini pakinaklupi kevyällä 2024, enšimmäini pakinakerta

Stolakirja 23.1.2024

Kirjuttan: Olga Karlova

Enšimmäiseh Zoom-pakinakertah keräyty hyväččäini joukko klupilaisie, kaikkieh 15. Kolme enšikertalaistaki oli. Tulkua terveh kaikin: ket pakajamah, a ket vain kuuntelomah. Kaikilla olemma ruati! Omua pakinaneruo ei pie čuipottua, šentäh myö ni keräyvymmä jotta šaisima yheššä hivuo omua karjalan kielineruo.

Alkuh pakinaklupin vetäjä, Olga K. kerto klupin idejašta ta iellisien vuosien ruatoloista, esitti karjalan kielen elvytyšprojektin blogissa olijan Vienankarjalaisen pakinaklupin šivuo ta šamannimellistä Feispuukissa olijua joukkuo, kumpaseh pyritti luatimah päivitykšie karjalakši. Täššäki ei pie varata ta tavotella pitkie tekstijä, ihan vain mitä ičen himottais jakua karjalan kielellä kuvineh päivineh. Blogihki voipi ruveta smiettimäh vereštä tekstie vienankarjalakši. Kaikki linkit ta muutki pakinašša mainitut asiet löyvytäh liittehenä olijašta diaesitykšeštä.

Tänä kevyänä pakajamma Šuomen Vienan kylistä, rahvahašta ta kieleštä. Rimpi, Kuivajärvi ta Hietajärvi oltais šiitä miän tähtäimeššä. Pertti Virtarannan Vienan kyliä kiertämässä ta Vienan kansa muistelee meilä kaikilla kotiluvennakši. Miän joukošša on hyväkši mielekši Hietajärveššä šyntynyt ta lapšuon viettänyt Pirjo S., kumpani käypi kotikyläh ainaški kešin, konša vain piäššöy. Pirjuo voimma pakauttua. Eklein jo šaimaki kuulla Pirjolta mukavua tietuo hietajärveläiseštä kielimuasterista Ranta-Miikkulašta, ketä Virtaranta on pakautellun omih kirjoih. Lukima Pirjon tuaton Jussi Huovisen 70-vuotispäivän jälkeh vuotena 1994 Ylä-Kainuun lehteh työnnetyt passipošanat karjalakši (kačo diat). Pirjo muisti kertuo, kuin tämä teksti on šyntyn, kuin šitä koko perehellä kirjutettih.

Tulijakši kerrakši olemma šopin ottua Hietajärven kylän paistavakši tiemakši. Kellä on mahtuo ta aikua, voitta lukie Virtarannan kirjoista peruštietuo kyläštä (niisi rahvahan pakinua, starinua t.n.i.) ta tiettäväini muuvval’taki, mistä van löytynöy tietuo.

Voimma tulijalla kertua paissa ni enšimmäisaren 22.1. 19–22 aikah tullutta Yle Radio 1 Maanantai-tulet -programmua, kumpaista voipi kuunnella kuun päivät 22.2.24 šuaten Yle Areenassa: Linkki Karjalaisuus elää keskuudessamme
”Kuinpa karjalaisuš košettay šilma ta šiun perehtäš? Ollouko šiun šuvušša karjalaisie juurie ta oltanehko perintehet iellähki käytöššä? Tunnetko imehnisie, kellä olis karjalaisie šukujuurie?

Eklisen pakinakerran lopukši jokahini šaneli vähän ičeštä, kaikin piäštih iäneh kuin uuvvet niin ni entiset klupilaiset.

Olen luvannun työntyä tietuo Karjalan kielen lukupiiri -kurššista, kumpani on verkkokuršši (opaštaja Ilja Mošnikov), ta še pietäh Päivännoušu-Šuomen yliopissošša tänä kevyänä. Opaštuo voipi avonaisen yliopisson kautti, ilmottautumini 28.1.2024 šuaten.

Karjalan kielen murtehet -kurššista annan tietuo tulijalla keralla, še alkau kevyämmällä 19.3.2024.

Näkeyvymmä 5.2. klo 16.40!