Lauri Luukkonen: Haikurunoloi
Täl sivul julguammo Lauri Luukkozen haikurunoloi.
31.1.2022
KAHEKSA HAIKUU
![Talvi](https://blogs.uef.fi/karjalanelvytys/wp-content/uploads/sites/155/2022/01/Kaheksa_haikuu-300x164.jpg)
5.10.2021
Lauri Luukkonen on työndänyh jullattavakse nellitostu omua čomua da syviä haiku-runuo:
Sygyzy, mindäh
et piästä talvie meijän
hieruh gost’akse?
***
Paiči tabakan
tulipeziä ei pihas
muudu valgiedu.
***
Harmualoi päivii
toine toizele jälles.
Alakuložus.
***
Päiväine, älä
moine varačču ole.
Tule nägövih!
***
Mullozes kezäs
en tänäpäi nimidä
tahtos duumaija.
***
Sygyzyn jälles
roih talvi – ga vuottajan
aigu on pitky.
***
Ekonomistan
pagin radivos vaiku
tyhjy urostus.
***
Midäbo uuttu
koronaviirusas myö
huomei tiijämmö?
***
Loukkuo mollembis
villusukis, ga pätäh
vie tuliel talvel.
***
Tuatto da muamo!
Elänhäi täl muakeräl
vaiku kodvazen…
***
Kusbo oletto,
työ anhelit, kudamii
nikonzu en näi?
***
Vähäine dengua
bankučotal vie jiännyh
da leibiä škuapas.
***
Rubein mennyzii
mustelemah – kuppizes
vilustui čuaju.
***
Tabakat kuhn’an
stolal, piivot jiäškuapas.
Ga sinä iäres…
***
Lauri Luukkonen
Kuva: Hiloin Natoi
21.6.2021
Lauri Luukkonen on työndänyh jullattavakse kolmetostu omua čomua da syviä haiku-runuo:
Yläh kosmosan
loittozih tiähtih kačon.
Rungas roih vilu.
****
Lattien ual hiiret
bizbetetäh rouno ku
olimpielazis.
****
Ei minuu ole
unohtettu: laskuloi
poštujuaššiekas.
****
Yksinäh olles
keitän riissuu yhtele
ristikanzale.
****
Kuundelin Buddhan
sanoi, ga häi pagizi
vierahal kielel.
****
Susiedan koiru
juoksou talois ymbäri.
Varoi nagrau puus.
****
Estounielaine
hirvi tuijottau minuu
televiizoras.
****
Tuulen iäni yöl
kui kielettömän miehen
pitky hengähtys.
****
Päiväs päiväh on
kuuzi kuudu tuttavan
brihan kuolendas.
****
En ni tänäpäi
eloksen tarkoitustu
maltanuh reššie.
****
Lyhyt kodvaine –
suuri pilvi taivahal
muzavui seičas.
****
Ken minun ustu
avaittau? – Tuuli vaiku
pihas harhailou.
****
Olengo fleitu
kudamal tundematoi
puhuu sävelmöi?
****
Lauri Luukkonen
Kuva: Pixabay