Köykän Outin starinoista uutta videota vienankarjalakši YouTubešša

Vuokkiniemi-šeura on julannun omalla YouTube-kanavallah 11 uutta videota vienankarjalakši. Köykän Outin starinat Vuokkiniemeššä vuotena 1968 -videošarja 2 jatkau vuosina 2022–2024 alkanutta yhtehisruatuo, min oloh oltih piäšty ilmoih enšimmäiset iänitehvideot ošana karjalan kielen elvytyšprojektie. Uuvvet videot on luajittu yhtehisruavošša Päivännoušu-Šuomen yliopisson karjalan kielen oppiainehen kera.

Videoloissa käytetyt iänittehet ollah Kotuksen iäniteharhiivan vanhoja pakautteluja, kumpasie kirjutti Vienan Karjalan matallah Vuokkiniemeššä vuotena 1968 akatiemikka Pertti Virtaranta. Hänen pakauteltavana kuulet 90-vuotista vienalaista šanamuasterie, starinankertojua Outi Lipkinua, kumpaista vuokkiniemöveh kučuttih Köykän Outiksi.

Pakinatiemat ollah ylen kirjakkahat. Toisen serien videoloilla kuulet rahvahan uškoh liittyjyä starinua vetehiseštä ta uartehista, šuat tietyä, mitä ruattih vierissänkešellä tahi mistä riähkä tulou. Omannäköistä luonnon ihualentua ta tuntomušta niise košetat, konša čukellat pakinoih tähtilöih ta ukonkuareh nähen. Vuokinjoven kruakut ta simčukat ta täh tiemah liittyjät ruavot ta šanašto muanitetah kuuntelomah jokahista tiijonhimoista imehnistä. Vienalaisista šukuloista ta perehistä kiinnoštunuot löyvetäh hyöki kallisarvoista tietuo.

Kuultuo pakinua elävyššetäh videoloissa vaihtujat kuvat idejana kuvual’l’a Vienan Karjalan elošijoja, rahvašta ta kulttuurie. Erähih videoloih luatijie on lykystän löytyä juuri niijen vuokkiniemeläisien kuvie, keštä videolla paissahki.

Ošan uušissa videoloissa käytettyjä iänittehie ollah litteroitu karjalan kielen opaštujat Päivännoušu-Šuomen yliopissošta. Litterointa on luajittu kuršširuatona Karjalan kielen murtehet -kurššilla. Videoijen käsikirjutukšet on planiiruinun vienankarjalan opaštaja Olga Karlova. Videokokonaisuot on luatin tuottaja ta gruafikko Jussi Sinkkonen. Videošarjan toisen ošan valmehekši šuantua on tuken Vuokkiniemi-šeura.

Linkki Köykän Outin starinat Vuokkiniemeššä vuotena 1968 –videoloih YouTubešša.

Karjalan kielen elvyttämisen blogissa voit lisäkši tuttavuštuo videoloissa paistuloih tiemoih ta šanaštoloih Köykän Outin starinat. Kuuntelet, kačot, opaššut -šivulla. Šivun materijalit täyvennetäh videoloissa kuultuo ta nähtyö, ne on luajittu karjalan kielen opaštujie tai opaštajie varoin.

Linkki Köykän Outin starinat. Kuuntelet, kačot, opaššut -šivulla elvytykšen blogissa.