Jovensuun Paginpertit keviäl 2025

Vuvven 2025 ezmäine Nuorien Paginperti piettih nellänpiän 9.1. Paginpertiläzet vastavuttih ezmästy kerdua Päivännouzu-Suomen yliopiston kampuksel olijas kaminpertis. Hyväččäine yheksän hengen joukko syndyi pertih hyvin da tilua olis olluh vie ližiägi. Rakkahal jatkammo kaminpertis vastavundua! Koufeit-čuajutgi voimmo kaminpertis keittiä.

Nuorien Paginpertin ezmäine vastavundu oli välly da lämmin. Keräl oli kui vedäjäle tuttavua alallistu kävijiä, mugai ihan uuttu ristikanzua, ylen hyvä! Mustoitammo sit, gu paginpertilöih voibi ainos tulla vaigu kuundelemahgi. Puaksuh kuundelemah tulluotgi ihan huomuamattah paistah karjalakse, sendäh gu suomi da karjala ollah lähäzet sugukielet da paginpertin kielikyly ylen effektiivine. Paginpertis on kebjei ellendiä, gu karjalan tulii aigu on pozitiivine: nuoret paistah toine toizenke karjalakse, ihan välläh da luonnollizesti, da kehitetäh omua kieldy. Ližäkse nuoret ollah aktiivizet da smietitäh, mittumil projektoil oman kielen stuatussua vois nostua. Heijän mieles tarvitah ezimerkikse podkastua, kiännöskirjalližuttu da uuttu muuzikkua karjalakse. Tahtottavalleh suammo nämmii kaikkii!

Yliopistol ruadau tänägi vuon kogo keviän aijan kaksi paginpertii: kaikile avvonaine Kaikkien Paginperti da nuorih niškoi perustettu Nuorien Paginperti. Nuoriengi Paginpertih niškoi ei ole tarkua igärajua, ga paginan tiemat da mahtollizet aktivitietat vallitah nuorien mielilöin mugah. Mollembih paginpertilöih voit ottua ozua kielenmaltoh libo käytettyh karjalan kielimuodoh kaččomattah da, tarvinnou, käyttiä avukse ezimerkikse suomie. Ollou sinul midä kyzyttäviä libo varaitannou Paginpertih tulendu, voit kirjuttua sähköpoštua vedäjile. Nuorien Paginpertin vedäi on Niko Tynnyrinen (niko.tynnyrinen@uef.fi) da Kaikkien Paginpertin vedäi Natalia Giloeva (natalia.giloeva@uef.fi).

Päivännouzu-Suomen yliopiston organizuittavat Paginpertit pietäh iellehgi kaminpertis. Kaminperti on Aurora-huonukses. Sih piäzet, konzu lähtet astumah Agoran da kirjaston pihalpäi huruale da kiännyt enne alačikävelyhoduu oigiele pienih pordahih. Pordahien jälgeh pidäy kiändyö oigiele da sebrata huonuksen seiniä, kuni et piädyne kaminpertin veriäle. Kaminperti voi olla jygiettävy löydiä, da sendäh paginpertiläzet voijah sežo kerävyö Agora-huonuksen da kirjaston välizele pihale, Algukivet-paččahan viereh viitty minuuttua enne Paginpertin avuandua da astuo kaminpertih yhtes.

Kačo täs Jovensuun Paginpertilöin piendyaijat:

Pakkaskuu

Kaikkien Paginperti: 30.1. č 16–18

Tuhukuu

Nuorien Paginperti: 13.2. č 16.30–18.30

Kaikkien Paginperti: 27.2. č 16–18

Kevätkuu

Nuorien Paginperti: 13.3. č 16.30–18.30

Kaikkien Paginperti 27.3. č 16–18

Sulakuu

Nuorien Paginperti: 10.4. č 16.30–18.30

Kaikkien Paginperti: 24.4. č 16–18

Oraskuu

Nuorien Paginperti: 15.5. č 16.30–18.30

Kaikkien Paginperti: 22.5. č 16–18