Karjalan kielen viikko (25.11.–1.12.2024)

Karjalan kielen viikkoa vietetään vuonna 2024 viidettä kertaa. Kutsumme kieliyhteisön jäsenet ja kaikki karjalan kielestä kiinnostuneet yksityishenkilöt ja yhdistykset pohtimaan, miten karjala omassa elämässä tai toiminnassa näkyy ja miten sen roolia voisi lisätä. Osallistumisohjeet on annettu karjalan kolmella päämurteella. Tule mukaan!

Vienankarjalakši:

27. pimiekuuta Šuomešša pruasnuijah karjalan kielen päivyä. Šen kunnivokši piemmä karjalan kielen netälin 25.11.–1.12., kumpasen jokahisešta päiväštä tulou karjalan kielen päivä. Šillä netälillä joka päivä julkuamma mitänih karjalakši Karjalan kieli eläy -šivulla Facebookissa šekä Karjalan Šivissyššeuran Uutisčuppuh. Julkaukšet keryämmä niise elvytyšprojektih blogih. Yhy šieki karjalan kielen netälih!

Vuuvven 2024 tiemakši on valittu ”karjalakši joka päivä”. Tiema on tarkotukšella aijempie vähäistä vällempi, ta šen idejana on kuččuo smiettimäh karjalan roulie omašša jokapäiväseššä elokšešša. Tiemua voipi kačella moneh luatuh. Voit esimerkiksi kertuo mistänih unohtumattomašta päiväštä, konša olet käyttän karjalan kieltä, tahi šanella, kuin käytät tahi tahtosit käyttyä karjalua omašša elokšešša. Kučumma jakamah vesselyä ta positiivista kokemušta. Ei olle šiula vielä kokemušta karjalan kielen käytännäštä, voit huaveilla ta aprikoija, millä neuvoloin voisit lisätä kielenkäyttyö omah elokšeh. Kielen käyttämiseššä kaikista jykein on alotanta, ta kielenmaltto kohenou vain kieltä käyttämällä. Kyven käyttyä kieltä voipi šyttyö pieneštäki kokemukšešta. Šiun kokemuš voipi auttua ketänih toista käyttämäh karjalan kieltä, šentäh šen juanta on tärkie.

Voit ottua ošua tempaukšeh, kuin iče tahot. Voit työntyä meilä esimerkiksi lyhyččäisen tekstin (puolisen šivuo), videon (šiinä yksi minuutti on hyvä pituvuš), taituo, komiksua, runohutta, kuvan ta kuvatekstin tahi mitänih muuta. Työntämällä materijalie elvytyšprojektilla annat luvan šiih, jotta še julatah projektin somekanavoilla ta Karjalan Šivissyššeuran Uutisčupušša.

Tekstiainehissot tarkissetah. Kirjuttajan oma murreh šuau näkyö tekstissä, ka elvytyšprojektin blogissa julattuja tekstijä voijah käyttyä niise opaššannašša. Šentäh tekstien pitäy nouvattua karjalan nykyistä kielioppie ta oikeinkirjutušnormie. Toisie ainehistoja (esimerkiksi videot) ei tarkisseta.

Vuotamma kuvie, videoloita, kirjutukšie ta hoš mitä muuta kielimaterijalie šähköpoštih (karjalanelvytys@uef.fi) 17.11.2024 šuaten. Myöhempäh työnnettyjä materijalija emmä vältämättä voi julata.

Lisäkši voit kirjuttua meilä tietuo karjalan kielen netälin oloh piettävistä pitoloista tahi tempaukšista. Niistä kerrotah elvytyšprojektin blogissa ta karjalan kielen netälin šomesivuloilla.

Suvikarjalaksi:

27. pimiekuuda Suomessa pruaznuijah karjalan kielen päiviä. Sen kunnivoksi piemmä karjalan kielen nedälin 25.11.–1.12., kumbazen jogahizesta päivästä tulou karjalan kielen päivä. Sillä nedälillä joga päiviä julguamma midägi karjalaksi Karjalan kieli eläy -sivulla Facebookassa segö Karjalan Sivissysseuran Uudisčuppuh. Julgavot keriämmä lizäksi elvytysprojektan blogah. Yhy siegi karjalan kielen nedälih!

Vuuven 2024 tiemaksi on vallittu ”karjalaksi joga päiviä”. Tiema on tarkotuksella aijembie vähäistä vällembi, da sen idejana on kuččuo smiettimäh karjalan roulie omassa jogapäiväzessä eloksessa. Tiemua voibi kačella moneh eri luaduh. Voit ezimerkiksi kerduo mistägi unohtumattomasta päivästä, konza olet käyttän karjalua, libo sanella, kuin käytät libo tahtozit käyttiä karjalua omassa eloksessa. Kučumma jagamah vesseliä da pozitiivista kogemusta. Ei olle siula vielä kogemusta karjalan kielen käytännästä, voit huaveksie da duumaija, mih luaduh voizit lizätä karjalua omah elokseh. Kielen käytännässä kaikista jygein on allanda, da kielenmaltto kohenou vain kieldä käyttämällä. Kyven käyttiä kieldä voibi syttyö pienestägi kogemuksesta. Siun kogemus voibi auttua kedätahto toista käyttämäh karjalan kieldä, sentäh sen juanda on tärgie.

Voit ottua ozua tembaukseh, kuin iče tahtot. Voit työndiä meilä ezimerkiksi lyhyččäzen tekstan (siinä puoli sivuo), videon (nenga yksi minuutta), taiduo, sarjakuvua, runohutta, kuvan da kuvatekstan libo midätahto muuda. Työndämällä materijualua elvytysprojektalla annat luvan sih, kuin se jullatah projektan somekanavoilla da Karjalan Sivissysseuran Uudisčupussa.

Teksta-ainehissot tarkissetah. Kirjuttajan oma murreh suau nägyö tekstassa, ga elvytysprojektan blogassa jullattuloi tekstoi voijah käyttiä vielä opassannassa. Sentäh tekstat pidäy olla kirjutettu nouvattuan karjalan nygöistä kielioppie da oigeinkirjutusnormua. Toizie ainehistoloi (ezimerkiksi videot) ei tarkisseta.

Vuotamma kuvie, videoloi, kirjutuksie da hos midä muuda sähköpoštah (karjalanelvytys@uef.fi) 17.11.2024 suaten. Myöhembäh työnnettylöi materijualoi emmä välttämättä voi jullata.

Lizäksi voit kirjuttua meilä tieduo karjalan kielen nedälin aigah piettävistä pidoloista libo tembauksista. Pidoloista da tembauksista kerrotah elvytysprojektan blogassa da somekanavoilla.

Livvinkarjalakse:

27. kylmykuudu Suomes pruaznuijah karjalan kielen päiviä. Sen kunnivokse piemmö karjalan kielen nedälin 25.11.–1.12., konzu joga päiviä roih karjalan kielen päivy. Sil nedälil joga päiviä julguammo midägi karjalakse Karjalan kieli eläy -sivule Facebookas sego Karjalan Sivistysseuran Uudisčuppuh. Julgavot keriämmö sežo elvytysprojektan blogah. Yhty sinägi karjalan kielen nedälih!

Vuvven 2024 tiemakse on vallittu ”karjalakse joga päiviä”. Tiemu on tarkoituksel aijembii vähästy vällembi, da sen tarkoituksennu on kuččuo duumaimah karjalan roulii omas jogapäivähizes elokses. Tiemua voibi kačella äijäh eri luaduh. Voit ezimerkikse kerduo mittumasgi unohtumattomas päiväs, konzu olet käyttänyh karjalua, libo sanella, kui käytät libo tahtozit käyttiä karjalua omas elokses. Kučummo jagamah vesseliä da pozitiivistu kogemustu. Ei olle sinul vie kogemustu karjalan käytändäs, voit huaveilla da duumaija, mih luaduh voizit ližätä karjalua omah elokseh. Kielen käytändäs kaikis jygevin on allandu, da kielenmalto kohenou vaigu kieldy käyttämäl. Kyven käyttiä kieldy voibi syttyö pienesgi kogemukses. Sinun kogemus voibi avvuttua kedätahto tostu käyttämäh karjalua, sendäh sen juandu on tärgei.

Voit ottua ozua nenga, kui iče tahtotgi. Voit työndiä meile ezimerkikse lyhyččäzen tekstan (nenga puoli sivuu), videon (nenga yksi minuuttu), taiduo, komiksua, runohuttu, kuvan da kuvatekstan libo midätahto muudu. Työndämäl materjualua elvytysprojektale annat luvan sih, gu se jullatah projektan somekanualoil da Karjalan Sivistysseuran Uudisčupus.

Tekstuainehistot tarkistetah. Kirjuttajan oma murreh suau nägyö tekstas, ga elvytysprojektan blogas jullattuloi tekstoi voijah käyttiä sežo opastandas. Sendäh tekstat pidäy olla kirjutettu novvattajen karjalan nygösty kielioppii da oigiehkirjutusnormua. Toizii ainehistoloi (ezimerkikse videot) ei tarkisteta.

Vuotammo kuvii, videoloi, kirjutuksii da hos midä muudu sähköpoštah (karjalanelvytys@uef.fi) 17.11.2024 sah. Myöhembä työttylöi materjualoi emmo vältämättäh voi jullata.

Ližäkse voit kirjuttua meile tieduo karjalan kielen nedälin aigua olijoih pidoloih libo tembavuksih näh. Pidolois da tembavuksis kerrotah elvytysprojektan blogas da somekanualoil.