Nuorien Paginperti 17.9.2023

Terveh teile! Tulgua nuorien Paginpertih!

Elvytysprojektal silloi-toiči kyzytäh nuorile luajittuu materjualua libo nuorih niškoi piettäviä tapahtumua. Nuorien pagizijoin virittämine karjalah on ylen tärgei dielo da sendäh elvytysprojektan hantuzis rubiemmo sygyzyl 2023 pidämäh tavanmugazen Paginpertin ližäkse omua Paginpertii juuri nuorih karjalazih niškoi.

Nuorien Paginpertil ei ole virrallistu ylä- libo alaigärajua. Tahtommo kuččuo nuorien Paginpertih kaikkii iččie nuorinnu pidäjii karjalazii, ga mustoitammo, gu vastavundoin tiemat päitäh nuorien elokseh da niilöi vallitah nuorien mielien mugah. Paginpertis voit paista omal murdehel libo hos mittumal segakielel da käyttiä avukse ezimerkikse suomie, kui vai maltatgi. Et ruohtine vie paista, vastavundah voit tulla vaigu kuundelemahgi. Paginpertis opastutah pagizemah kaikenualazis dielolois, kižatah sanakizoih da kerätäh nuorile tärgiedy sanua. Paginpertin vedäjänny on Niko Tynnyrinen, ližäkse puaksuh keräl ollah Natalia Giloeva da Olga Karlova (libo kengi yksi heis).

Nuorien Paginperti vastavuu ylehizen Paginpertin tabah Jovensuus (Rantakatu 23 A, kellarikerros). Ezmäzel kerdua 17.9. č 15–17 nuorien Paginperti roih vaigu rožači, sendäh gu Paginpertin piendiä vaste rubiemmo opittelemah. Toizih vastavundoih tulou mahto ottua ozua sežo loitoči, ollou sih tarvehtu. Linkan suandas kerrotah sit eriže.

Ollou kyzyttäviä, pane viestii Nikole (niko.tynnyrinen@uef.fi).